Zinema eta antzerki sozialaz beteriko lau egun, Homeless Film Festivalen bederatzigarren edizioan
Homeless Film Festival jaialdiaren bederatzigarren edizioa azaroaren 13an eta 14an izango da, Bilboko Bizkaia Aretoan, baina beste bi zinema jardunaldi ere izango dira, azaroaren 7an eta 21ean, Bilboko Golem Alhondiga zineman eta Santurtziko Serantes Kultur Aretoan, hurrenez hurren.
Bederatzigarrenez antolatu du Bizitegi elkarteak zinema eta antzerki sozialaren jaialdi hau, etxerik gabeko eta gizarte bazterkeriako egoeran dauden pertsonen ikusgarritasuna eta inklusioan arreta jartzeko. Gainera, urtetik urtera, gero eta kalitate handiagoko edukia eskaintzen saiatzen da, EITBren eta Eusko Jaurlaritzako Kultura eta Hizkuntza Politika Sailaren babesarekin eta Akitania Berria-Euskadi-Nafarroa Euroeskualdearen kofinantzaketarekin.
Hilaren 7an, “Los indeseables” film frantziarra egongo da ikusgai, “Los miserables” filmagatik Oscar Internazionalerako izendatua izan zen Ladj Ly zuzendariaren Parisko aldiriei buruzko thriller soziala. Azken egunerako, azaroaren 21erako, Paola Cortellesiren “Siempre nos queda mañana” film italiar arrakastatsuaren aldeko apustua egin du jaialdiak.
Antzerki sozialaren jaia
Azaroaren 13ko jardunaldia antzerkiari eskainiko zaio oso-osorik, goizez zein arratsaldez. Zenbatu antzerki konpainia arduratuko da jardunaldiari hasiera emateaz, Ivan Iparragirrek zuzendutako “Debajo del puente” antzezlanarekin.
Ondoren, IES Ibarrekolanda BHIko Arte Eszenikoen Batxilergoko ikasleek dantza ikuskizun bat eskainiko dute, eta goizeko emanaldia Bizitegiko Kuskurrum Teatro antzerki konpainiarekin amaituko da. Azken horrek 25. urteurrena ospatuko du, urte hauetan egindako antzerki ibilbideari buruzko erakustaldi batekin.
Arratsaldean, Pep Vilak zuzendutako “El paraíso de los rotos” antzezlana antzeztuko du Parena antzerki konpainiak, Lorena Arangoa eta Patxi Larrea aktoreekin. Larrearen arabera, komedia kutsuko ikuskizuna da, eta haustura pertsonal eta sozialei buruz hitz egiten du Juana eta Tomasen bitartez, ahal duten moduan bizirauten duten baztertutako bi pertsona.
Film laburrak, protagonista
Azaroaren 14rako, zinema ardatz izango duen jardunaldia prestatu dute antolatzaileek, nahiz eta antzezlan txiki bat ere izango den. Izan ere, goizeko ekitaldia “Nork lotu zaitu gurdi honetara?” antzezlanarekin hasiko da, IES Ibarrekolanda BHIko ikasleen eskutik.
Jarraian, Bizitegin ekoitzitako eta Iñigo Cobok zuzendutako film laburrak eta ikastetxeetako ikasleek egindako film labur sarituak proiektatuko dira (Artxandape Ikastola, Begoñazpi Ikastola, IES Rekalde BHI, IES Ibarrekolanda BHI, IES Ondarroa BHI, CIFP Tartanga LHII eta CIFP Meka LHII).Arratsaldean, 19:00etatik aurrera, Bizitegin ekoitzitako film laburrez gozatzeko aukera izango da berriz ere, baita Nüll Garciak zuzendutako “Malegro verte” lana ere, Santurtzi Zine Jaialdian Kalean saria irabazi duena. Gainera, Euskal Herriko Unibertsitateko ikasleek egindako film laburra proiektatuko da. Izan ere, Gizarte eta Komunikazio Zientzien Fakultateak, Medikuntzakoarekin batera, Homeless Film Festival jaialdian parte hartu du, Miren Gabantxo UPV/EHUko Publizitatean doktorearen hitzetan, iritziak komunikabideek baldintzatzen dituztelako: “Gure ikasleek etxerik gabe dauden pertsonen errealitatea ezagutzean, desberdinekiko gorrotoaren aurkako txertoa jasotzen dute”.
Arratsaldeko emanaldi hau Xabier Madariagak aurkeztuko du, eta Homeless Film Festivaleko Sail Ofizialeko EITB Besarkada Saria “El extraño caso del hombre bala” film labur ekuadortarrak. Roberto Valenciak zuzendutako lana da, etxe berri baten bilaketari buruzko metafora animatua.
