Beste urte batez, gizarte bazterkeriako egoerak ikusarazten
Bilbon kalean bizi diren pertsonen kopurua bikoiztu baino gehiago egin da azken urtean. Xabier Madariagak titular horrekin hasi nahi izan du Homeless Film Festival 2024 jaialdiari amaiera emateko ekitaldia, bertan zeudenek jaialdiaren arrazoia izan zezaten gogoan, etxerik gabeko pertsonen egoera gogoan izan zezaten.
Arratsalde osoa zinema sozialari zuzenduta egon da, eta bertaratutako ikusleek era guztietako pertsonek, profesionalek zein afizionatuek, egindako film laburrez gozatu ahal izan dute.
Lehenengo minutuak Bizitegiren zine tailerretan egindako lanentzat izan dira: “Atraco a la nostalgia” eta “Míralas”.
Eta Bizitegiren film laburretatik Kalean taldekoetara. Aurten ere, Santurtziko Zinemaldian Kalean saileko irabazlea saritu nahi izan da, izan ere, Bizitegiko erabiltzaileek, Santurtziko zinemaldiaren barruan, gizarte-balioak hobekien islatzen dituen film laburrari ematen diote saria. Oraingoan, Nüll Garcíak zuzendutako “Malegro verte” film laburra saritu dute, zuzendari bera eta Alba Flores protagonista dituena. Galan egon ez diren arren, grabatutako mezu bat bidali nahi izan dute saria eskertzeko.
Jarraian, jaialdiaren eta UPV/EHUren arteko lankidetza gero eta estuagoa ikusarazi da. Izan ere, hari esker, ikasleek gertutik ezagutzen dute Bizitegiko erabiltzaileen egoera, film laburrak egiteko inspirazioa ematen baitiote. Horren erakusgarri da saria jasotzean ikasle irabazleek erakutsi duten esker ona: “Eskerrik asko bigarren aukerak badirela erakusteagatik. Ate bat ireki diguzue “.
Aurten, gainera, UPV/EHUko Medikuntza eta Erizaintza Fakultateak ere parte hartu du, Gizarte eta Komunikazio Zientzien Fakultate beteranoarekin batera. Miren Gabantxo Publizitateko doktore eta Gizarte eta Komunikazio Zientzien Fakultateko irakasleak eta Virginia Guillén psikologo eta Medikuntza eta Erizaintza Fakultateko irakasleak unibertsitatean egindako dinamikak azaldu dituzte, ondoren fakultate bakoitzeko film labur irabazleak proiektatzeko: “Eman eskua” eta “Luzatu zure eskua”.
Arratsaldeak aurrera egin du txalo eta txalo artean, eta horrela iritsi da Sail Ofizialeko film labur finalistez gozatzeko unea: Alessandro Panzaren “La legge del mercato” eta Christian Femenia I Reverteren “Macumbo”. Jarraian, Besarkada saria eman zaio Roberto Valenciak zuzendutako “El extraño caso del hombre bala” film labur irabazleari.
Aurten ere, Homeless Film Festival jaialdiak ikusleen emozioak astintzea lortu du, eta ezinegonez itxaroten du hurrengo edizioa, urteurren biribila ospatuko duena.
* Homeless Film Festival EITB Taldeak eta Eusko Jaurlaritzako Kultura eta Hizkuntza Politika sailak babestu dute; Akitania Berria-Euskadi-Nafarroa Euroeskualdeak kofinantziatu du; eta BBK Fundazioaren laguntza jaso du.
