Homeless Film Festival jaialdiaren hamaikagarren edizioaren gala, etxegabetasunaren eta gizarte-bazterkeriaren errealitatea zinemaren bidez ikusarazteko
Bizkaia Aretoa errealitaterik ikusezinenen bozgorailu bihurtu da berriro Homeless Film Festival jaialdiaren galan. Xabier Madariaga kazetariak gidatuta, lehiaketaren ekitaldi nagusiak zinemagileak, unibertsitateko ikasleak eta herritarrak bildu zituen gogoeta sustatzeko sortutako ikus-entzunezko pieza sorta baten inguruan.
Bizitegiren baitan sortutako lanei begira hasi zen saioa. Iñigo Cobok zuzendutako ‘El Club de las Invisibles’ eta ‘El Semanario’ tituluen bidez, publikoak erakundeak bultzatutako sormen-tailerren irismen eraldatzailea egiaztatu ahal izan zuen pantailan; izan ere, ikus-entzunezko narrazioak parte-hartzaileak ahalduntzeko eta errealitateak ikusarazteko bide gisa balio du.
Gainera, jardunaldian ‘Retorno Desafío Senegal’ lanaren trailerra aurkeztu zen, eta agertokira igo ziren Mouhamadou Mansor Fall —2026an Urbegi Fundazioak Lo Imposible sarien harira bultzatutako Desafío Senegal gizarte- eta dokumental-proiektuko protagonista— eta Clotilde Pérez, Bizitegin 15 urtez Mouhamadouri lagundu dion pertsona.
Belaunaldi berrien inplikazioa izan zen jardunaldiko beste zutabe nagusietako bat, unibertsitate-lehiaketari esker. Bizitegiren eta komunitate akademikoaren arteko aliantzak gizarte-bazterkeriako egoeren eragina bertatik bertara hurbiltzen die ikasleei, berezko zigilua duten proposamen zinematografikoetan islatuz. Euskal Herriko Unibertsitatearen (EHU) esparruan, lan hauek saritu ziren:EHUko Gizarte Hezkuntza Fakultateko “Ciudad sin descanso”
– Deustuko Unibertsitateko Gizarte Hezkuntza eta Gizarte Laneko Fakultateko “Entre la sombra y el azar”
– EHUko Medikuntza eta Erizaintza fakultateko “Azken muga”
– EHUko Gizarte eta Komunikazio Zientzien Fakultateko “Abre los ojos”
Lurraldeko beste ekimen batzuekiko konpromisoak ere bere lekua izan zuen Kalean Sariaren banaketan, Bizitegik Santurtziko Zinemaldiarekin duen lotura estuaren ondorioz. Bizitegiko erabiltzaileek beraiek erabakitzen dute gizarte-gaietan oinarritutako sari hau, eta oraingoan Alma Prieto zuzendariak sinatutako ‘Cucarachas’ lana nabarmendu zuten.
Sail Ofizialaren baitan, Laura Vegak eta Juanfer Andresek batera zuzendutako ‘Yo No Mashallah’ lan finalista proiektatu zen —Juanfer Andrés agertokira ere igo zen—. Film laburrak Usmanen ibilbidea kontatzen du: paperik gabeko gazte migratzailea da, eta deserrotzearen gogortasunari aurre egiten dio, aukera bila sustraiak, maitasuna eta etxea atzean utzi behar izan ondoren.
Urrezko amaiera Sail Ofizialeko Besarkada Sariaren banaketarekin iritsi zen, EITBko Andrea Ibañezek emana. Pablo Olewski zuzendariaren ‘Catorce bajo derecha’ lanak jaso zuen saria, Bizkaia Aretoan Lara Loher eta Daniel Pérez Prada lagun zituela. Benetako bizipenetan oinarrituta, film laburrak aterpe duin baten faltak eta bizitegi-kalteberatasunak osasun mentalean duten zuzeneko inpaktuan sakontzen du.
Ekitaldian Jorge Carvalho kantautorearen zuzeneko musika-emanaldia ere izan zen; euskarazko bi abesti eskaini zituen, eta publikoaren txalo zaparrada beroa jaso zuen.
Aitor Ipiñaren amaiera-hitzaldiarekin eta parte hartu zuten taldeekin egindako ohiko familia-argazkiarekin, lehiaketak oihala jaitsi zuen, beste behin ere berretsiz zinemak bazterkeriaren aurrean enpatia, eztabaida kritikoa eta gizarte-kohesioa sustatzeko katalizatzaile gisa duen papera.
Argazki guztiak hemen: https://www.flickr.com/photos/homelessfestival/albums/72177720336886962